Brand by gewilde Kaapse restaurant
2010-06-15 11:17
Kaapstad – ‘n Brand het Dinsdagoggend uitgebreek by ‘n gewilde Italiaanse restaurant naby aan die Kaapstad-stadion in Groenpunt.
Rook het by Marios-restaurant, 'n eetplek oorkant die Groenpunt-verkeersirkel, uitgeborrel.
“ ’n Kliënt het aan my gesê dat rook uit die kombuis gekom het. Dit klink na slegte nuus,” het Nicholas Esposito van die naby geleë Giovanni’s Deli World aan Nuus24 gesê.
Ian Schnetler, brandweerhoof van die Stad Kaapstad, het bevestig dat vier reddingsvoertuie op die toneel is.
“Die brand het in die kombuis ontstaan, maar is nou onder beheer.”
Dié restaurant en verskeie ander in Somersetweg is gewild onder sokkergeesdriftiges wat wedstryde by die stadion gaan kyk.
Is jy op die toneel? Stuur jou foto’s aan ons.
Volg Nuus24 op Twitter.