Brand by Roodepoort-fabriek geblus

2013-02-22 09:27

Johannesburg – 'n Brand wat in die vroeë oggendure by 'n fabriek in Roodepoort uitgebreek het, is geblus, het die nooddienste gesê.

Robert Mulaudzi, woordvoerder vir die Johannesburgse nooddienste, het gesê brandbestryders het ure lank gespook om die brand te blus.

Erge skade is aan die gebou aangerig en vyf brandweerwaens en twee watertenkers is gebruik om die brand te blus.

Die brand het omstreeks 03:00 Vrydagoggend by die fabriek in Main Reefweg in Roodepoort uitgebreek.

Verkeersontwrigtings is ook aangemeld omdat die paaie naby die fabriek tydelik gesluit was.

Geen beserings is aangemeld nie.

"Die oorsaak van die brand is nie bekend nie, maar 'n ondersoek sal onmiddellik begin," het Mulaudzi gesê.

Houtbokse en verpakking vir geskenke word by die fabriek vervaardig.

– Volg Nuus24 op Twitter

- SAPA