Elf beseer in brand by Jhb-hotel
2010-11-07 10:57
Johannesburg – Elf mense is beseer nadat 'n brand by die Formula 1-hotel in Meredale, oorkant die Southgate-winkelsentrum in Johannesburg uitgebreek het.
Vier mense is vir ligte brandwonde opgedoen terwyl ander vir rookinaseming behandel is, het Esther Manzini, woorvoerder van die Johannesburgse nooddienste gesê.
Die brand het net na 07:00 in 'n kamer op die tweede vloer uitgebreek, waar 'n paartjie besig was om te slaap. Die paartjie is onder diegene wat vir brandwonde behandel is.
"Die kamer het uitgebrand en die hotel is ontruim. Die brand is onder beheer gebring voordat dit verder kon versprei."
Nege mense is na die Chris Hani Baragwanath hospitaal geneem en ander na die Lesedi-kliniek.
Die oorsaak van die brand is nog nie bekend nie, maar ondersoekbeamptes is op die toneel.
Volgens Derrick Banks, woordvoerder van ER24 het sommige mense lakens aanmekaar vasgemaak en by vensters uitgeklim.
- Volg Nuus24 op Twitter.