Brand bederf wegbreek in Mosambiek
2010-09-29 07:41
Johannesburg - ’n Idilliese langnaweek in Mosambiek het vir ’n gesin van Centurion in ’n nagmerrie ontaard toe die chalet waarin hulle gebly het met al hul besittings tot op die grond afgebrand het.
Die brand het in die slaapkamer begin waarin die twee Wentzel-seuns, Martin (6) en Hendri (8), geslaap het.
Martin het eerste wakker geword van swart rook wat in die kamer rondgewarrel het.
Sanri Wentzel van Centurion het gister terug by die huis, maar steeds geskok, gesê die brand het blitsig versprei.
Die gesin het vir die langnaweek in ’n chalet by Bilene, sowat 200 km noord van Maputo, gekuier.
“Dit was ons eerste kuier in Mosambiek en die naweek was so lekker.
“Dit was een of ander tyd Sondagnag toe Martin ons wakker geskree het. Ons vermoed die brand is dalk deur ’n kortsluiting in die kamer waar die seuns geslaap het, veroorsaak.
“Alles het baie vinnig gebeur en ons het gehardloop om net die kinders by die chalet uit te kry.
“My man (Hanro) het teruggehardloop om die sleutels van ons bakkie te gryp en dié kon ons wegtrek.
“Die chalet was in vlamme en het gou heeltemal afgebrand.”
Dit was ’n selfsorg-chalet en hulle het van klere, tot beddegoed, handdoeke en kampeerstoele saamgeneem. Alles tesame met hul reisdokumente en persoonlike besittings is in die brand verwoes.
“Die veiligheidswagte by die oord het ons nog gehelp om die brand met sand te blus, maar verniet. My hare is geskroei en ons kinders is steeds geskok.
“Gelukkig was my handsak met my ou identiteitsboekie en my man se beursie in die bakkie.
“Ek het toevallig ook afskrifte van die kinders se geboortesertifikate in my handsak gehad.
“Dít het gehelp dat die Mosambiekse polisie ons toegelaat het om sonder paspoorte deur die grenspos na Suid-Afrika terug te keer.”
Die gesin het ná die brand by vriende wat saam met hulle by die oord gebly het, tot bedaring gaan kom.
“Die polisie was baie behulpsaam. Ironies het ons met omtrent net R5 op ons naam by die grenspos opgedaag nadat die verkeerspolisie ons vir ’n spoedoortreding voorgekeer het. Ons moes met ons laaste geld op die plek ’n boete betaal.”
- Beeld