Botsing eis lewe van jong man
2011-12-05 09:05
Bloemfontein – ’n Jong man van Bloemfontein is dood en sy vriend ernstig beseer toe die bakkie waarmee hulle gery het van agter teen ’n konstruksievoertuig en werkers gebots het.
Vier van dié werkers is beseer.
Johan Boonzaaier (26) is op die toneel dood.
Sy vriend, Gerhardus Engelbrecht (28), bestuurder van die bakkie, was Sondag in ’n bevredigende toestand in die Life-Rosepark-hospitaal, sê Esmarie Cronjé, hospitaalwoordvoerder.
Sy sê hy het sagteweefsel-beserings, asook snywonde aan veral sy kop en arm opgedoen.
Die vier werkers is met minder ernstige beserings na die Pelonomi-hospitaal vir behandeling gebring.
Vanessa Jackson, woordvoerder van die ER24-ambulansdiens, sê die twee jong mans se voertuig is in die ongeluk op die hoek van Nelson Mandela-rylaan en Jac van Rhyn-straat heeltemal “oopgeruk”.
Sers. Thabo Litabe, polisiewoordvoerder, sê die mans het Saterdagoggend vroeg van agter teen ’n stilstaande konstruksiebakkie gebots.
Die konstruksievoertuig het glo by ’n rooi verkeerslig gewag.
Engelbrecht se familie het nie Sondag kans gesien om oor die ongeluk te praat nie.
Volg Nuus24 op Twitter
- Volksblad