Botman maak sy stem dik in taalstryd
2010-01-27 06:27
Liesl Peyper
Kaapstad - Aan die vooraand van die F.W. de Klerk-stigting se beraad oor die toekoms van Afrikaans aan universiteite het die Universiteit Stellenbosch (US) dit duidelik gemaak dat hy hom nie oor sy taalbeleid sal laat voorsê nie.
Die rektor van die US, prof. Russel Botman, het in ’n brief aan die hoof van die Suid-Afrikaanse Onderwysersunie (SAOU), Chris Klopper, gesê die US is ten gunste van samewerking met diegene wat Afrikaans in ’n meertalige konteks wil bevorder. “Nie onder dwang of afdreiging nie, maar in vryheid en vreugde”.
Botman se brief, gedateer 20 Januarie, volg op ’n skrywe wat die SAOU in November verlede jaar aan die US-raad gerig het waarin die vakbond sê hy is bekommerd oor die stand van Afrikaans aan die universiteit.
In dié skrywe sê die SAOU dat hy nog altyd “sonder skroom” aanbeveel het dat studente aan die US moet studeer, maar dat dit terselfdertyd belangrik is dat ’n student sy naskoolse studies in Afrikaans moet voortsit.
Botman het egter sy stem dik gemaak en gesê dit lyk of SAOU se brief daarop sinspeel dat as die US nie doen soos die vakbond sê nie, sal hy studente afraai om daar te kom studeer.
“Geen universiteit van formaat laat hom op hierdie wyse van buite af bestuur nie.”
Botman het voorts gesê dit mag wel wees dat daar voormalige Afrikaanse universiteite is wat hul getalle wit Afrikaanse studente wil vermeerder deur “samespanning” ten koste van ander universiteite “soos die US”.
“Die tersiêre onderwysmark is egter baie kompeterend en eindelik is loopbaankeuses en loopbaanvoorbereiding nie net ’n taal-aangeleentheid nie.”
Klopper het gister aan Die Burger gesê hy het nog nie Botman se skrywe ontvang nie, maar hy dra wel kennis van die verklaring wat die US verlede jaar uitgereik het in reaksie op SAOU se brief.
Volgens Klopper was dié mediaverklaring (wat in baie opsigte ooreenstem met Botman se skrywe) negatief en dit het boonop ’n sterk “rasse-ondertoon” gehad.
“Die US het dit laat klink of hy nie nodig het om vennootskappe met die SAOU te vorm nie, want hy het dit reeds met bruin en swart Afrikaanstalige skoolverlaters.
“Ons is maar net bekommerd omdat dit lyk of slegs voormalige Afrikaanse universiteite onder druk kom om meertalig te wees.”
Die beraad oor die toekoms van Afrikaans aan universiteite vind môre op die Vredenheim-wynlandgoed buite Stellenbosch plaas.
- Die Burger
