Borgtog toegestaan aan pastoor wat glo verkrag
2012-01-18 20:59
Johannesburg – Die pastoor van Limpopo wat daarvan beskuldig word dat hy drie lede van sy kerk verkrag het, is Woensdag op borgtog van R1 500 vrygelaat in die Polokwane-landdroshof.
Landdros Janine Ungerer het gesê die staat het daarin gefaal om die hof te oortuig dat die beskuldigde nie op borgtog vrygelaat moet word nie.
Die 50-jarige pastoor van die Devine Deliverance Church in Seshego staan tereg op drie aanklagte van verkragting – een in die Seshego-landdroshof en twee in Polokwane.
Hy is op oujaarsaand in hegtenis geneem nadat ‘n 20-jarige vrou ‘n klag van verkragting teen hom aanhangig gemaak het by die Seshego-polisiekantoor.
Kort nadat hy op borgtog van R2 000 vrygelaat is, het twee meisies, onderskeidelik 14 en 18 jaar oud, klagte teen hom aanhangig gemaak in Polokwane.
Die man se regsverteenwoordiger, J. Papule, wil hê die aanklagte in Polokwane moet teruggetrek word, aangesien die staat nie ‘n mediese verslag het om hul saak te steun nie.
Tydens die borgtogaansoek het Papule aan die hof gesê die aanklagte is ‘n sameswering om sy kliënt in die samelewing in oneer te bring.
Hy het geargumenteer dat een van die slagoffers nie minderjarig is soos vroeër beweer is nie.
Die saak is tot 29 Februarie uitgestel vir verdere ondersoek.
- Volg Nuus24 op Twitter
- SAPA