Booysen-beskuldigde is 'gelowig, goeie sportman'
2013-02-12 18:09
Bredasdorp – Een van die mans wat daarvan beskuldig is dat hy Anene Booysen vermoor het, is ‘n gelowige en ‘n talentvolle sportman, het sy oom, Johannes Kana, vroeër die week gesê.
Kana sê sy 21-jarige nefie, wat dieselfde naam en van as hy het, het in Engeland krieket gespeel.
“Ek het gedink dat wanneer hy terugkom sal hy goed doen soos rugby en krieket speel, maar kyk waar is hy nou.”
Kana sê sy neef is meer soos ‘n broer vir hom, want hulle het in dieselfde huis grootgeword, met sterk godsdienstige waardes.
“Ek is sy oom, maar ek het hom as ‘n broer aangeneem, want my ma en pa het hom grootgemaak. My hart is seer. Ek het dit [sy inhegtenisname] nie verwag nie. Dit is nie hoe hy grootgemaak is nie,” het die 22-jarige gesê.
Anene is om die beurt verkrag en vermink nadat sy by 'n kuierplek was. Sy is by die Asla-bouterrein, waar sy gewerk het, gevind, maar het later in die hospitaal gesterf.
Kana en Jonathan Davids (22) is van Booysen se verkragting en moord aangekla. Hulle sal weer op 26 Februarie in die Bredasdorp-landdroshof verskyn.
“[Anene se dood maak my] baie seer. Ek ervaar dit asof dit met my eie suster gebeur het,” het Kana se oom gesê.
– Volg Nuus24 op Twitter
- SAPA
