Boodskappe van ondersteuning vir Madiba
2012-12-09 07:54
Johannesburg – Pres. Jacob Zuma, Cosatu en vele ander Suid-Afrikaners het oudpres. Nelson Mandela, wat tans in 'n hospitaal is vir mediese toetse, alle sterkte toegewens.
"Ons wens Madiba net die beste toe. Die mediese span kan verseker wees van ons ondersteuning terwyl hulle na die geliefde eerste president van 'n vrye en demokratiese Suid-Afrika omsien en seker maak dat hy gemaklik is," het pres. Zuma Saterdag in 'n verklaring gesê.
"Soos ons voorheen gesê het, oudpres. Mandela sal van tyd tot tyd mediese aandag nodig hê, wat 'n mens kan verwag [by iemand van] sy ouderdom," het die president gesê.
Cosatu het ook goeie wense aan Madiba gestuur, wat Saterdag in 1 Militêre Hospitaal in Pretoria opgeneem is.
"Ons hoop dis waar – soos die president se woordvoerder berig het – dat daar geen rede tot kommer is nie," het Patrick Craven, die vakverbond se woordvoerder, in 'n verklaring gesê.
"Word gesond en hou aan om ons te inspireer," het hy gesê.
Die presidensie het die media en publiek gevra om Mandela en sy gesin se privaatheid te respekteer.
– Volg Nuus24 op Twitter.
- SAPA
