Bonnette sal buite hof bly
2012-02-09 16:55
Johannesburg – Ina Bonnette sal Vrydag buite die Modimolle-landdroshof bly wanneer haar vervreemde man verskyn op aanklagte daarvan dat hy haar seun vermoor het en haar verkragting georkestreer het.
“Ons sal... buite die hof bly,” het haar vriendin Elize Coetzer Donderdag gesê.
Sy het gesê Bonette wil nie binne die hof wees nie.
“Ina is ‘n baie sterk vrou en sy huil wel... maar sy vat dit een dag op ‘n slag. Al ons vriende het besluit om môre pienk met klein hartjies op te dra en ons sal om 08:15 na die hof stap.”
Johan Kotzé staar 17 aanklagte in die gesig. Dit sluit verkragting, moord, sameswering tot verkragting, ontvoering en aanranding met die opset om ernstig te beseer in. Op 3 Januarie het hy na bewering sy drie werkers beveel om die 42-jarige vrou om die beurt te verkrag en haar liggaam met onder meer spykers en ‘n skroewedraaier te skend.
Hy het na bewering haar 19-jarige seun, Conrad Bonnette, doodgeskiet toe hy (Conrad) by die huis aangekom het. Conrad het om sy lewe gepleit terwyl Bonnette in ‘n ander kamer vasgemaak was.
Die 50-jarige is op 11 Januarie in hegtenis geneem.
Sy drie medebeskuldigdes – Mmapuru Peter Mohlako (34), Andries Paparona Sithole (42) en Sello Frans Mphaka (38) – is binne dae van mekaar in hegtenis geneem.
Hulle is blykbaar aangestel om palmbome uit die tuin van Kotzé se gehuurde huis in Modimolle te verwyder.
Vroueregtegroepe en betogers sal na verwagting by die hof wees om Bonnette te ondersteun.
Brig. Hangwani Mulaudzi, woordvoerder van die polisie in Limpopo, het gesê die polisie sal seker maak orde word gehandhaaf by Vrydag se verhoor.
“In ag genome die feit dat die saak ‘n groot openbare belang het, verwag ons dat baie mense dit sal bywoon. Ons sal openbare orde-polisieering vroeg reeds by die hof mobiliseer.”
Gedeeltes van die hof sal afgesper wees.
“Ons doen ‘n beroep op die publiek om hulself te gedra tydens die verrigtinge. Die polisie sal dissipline verseker,” het Mulaudzi gesê.
Slegs joernaliste met perskaarte sal in die hofsaal toegelaat word wanneer die man wat die “Modimolle Monster” gedoop is en sy medebeskuldigdes verskyn.
Die Nasionale Vervolgingsgesag (NVG) het gesê dit is moontlik dat ‘n borgtogaansoek Vrydag aangehoor kan word.
“Daar is ‘n moontlikheid dat die saak vir verdere ondersoek uitgestel sal word of dat daar ‘n borgtogaansoek van sommige van die beskuldigdes kan wees,” het adv. Mthunzi Mhaga, woordvoerder, gesê. “Indien dit die geval is, sal die staat gereed wees om voort te gaan.”
- Volg Nuus24 op Twitter