Bolhuis: Joost skuld my duisende

2009-11-03 17:29

Kaapstad - Die privaatspeurder Mike Bolhuis beweer Joost van der Westhuizen skuld hom R750 000, en hy beplan om sy geld terug te kry.

Van der Westhuizen het van Bolhuis se dienste gebruik gemaak om bewerings te ondersoek na 'n omstrede seksvideo drie jaar gelede waarin die oud-Springbok glo verfilm is.

Die rugbyster het vandeesweek erken dat dit wel hy was wat in die video met die ontkleedanseres Marilize van Emmenis (nou 24) gefuif het en dwelms gesnuif het.

Bolhuis beweer hy het die geld vir Van der Westhuizen geleen omdat die voormalige Wêreldbeker-speler in 'n finansiële verknorsing was.

Die privaatspeurder het egter aan die Cape Argus gesê hy wil nou al sy geld terughê.

- Cape Argus