Bokskampioen Kallie Knoetze ry oor kleinkind

2012-11-26 10:22

Johannesburg – Kallie Knoetze se kleinseun is in ‘n stabiele toestand in die hospitaal nadat die voormalige swaargewig bokskampioen per ongeluk oor hom gery het.

Beeld berig Nuan (4) en sy broer, Lian (2), het verlede week by hul oupa op sy kleinhoewe naby Hartbeespoort gekuier toe hulle agter die bokslegende se bakkie beland het.

Knoetze was besig om te parkeer toe klein Nuan raakgery is.

“Oupa is groot en Oupa moet ophou huil. Als gaan orraait wees,” het die beseerde kind luidens die dagblad aan sy oupa gesê.

Nuan is in ’n stabiele toestand in die Eugène Marais-hospitaal in Pretoria, maar Knoetze het gesê hy sal na verwagting eers oor drie weke ontslaan word.

Sy bekkenbeen is gebreek.

“Ek het nog nooit gehuil soos in die afgelope paar dae nie,” het die oud-bokser aan die koerant gesê.

Volg Nuus24 op Twitter  

- SAPA