Bok-stut swaai glo vuiste by kuierplek
2012-02-21 08:02
Bloemfontein – Die Springbok- en Cheetahs-stut Coenie Oosthuizen was na bewering wéér in ’n bakleiery betrokke.
Na verneem word, het twee mans ’n woordewisseling gehad en Oosthuizen het na bewering ongenooid nader gestaan en aan een van die mans geruk en pluk.
“Hy het my gestamp en gesê hy sal my doodp**s. Hy het dit al voorheen ook gedoen.”
Volksblad het in 2009 berig oor ’n bakleiery waarby Oosthuizen ook betrokke was en toe na bewering ’n jong student se kakebeen afgeslaan het. Oosthuizen het dit destyds ontken.
In die jongste voorval het die eienaar van die kuierplek Barba’s, in Tweedelaan, glo twee mans uitgejaag en hulle het uit die kuierplek gestap.
Een van hulle vertel: “Ons was skaars by die ingang uit, toe Coenie van agter kom en my vriend slaan. Toe dié val, het Coenie bo-op hom gesit en aangehou slaan.”
Die Cheetahs-heelagter, Hennie Daniller, het glo die hele petalje gade geslaan, maar nie deelgeneem nie.
Ná die beweerde voorval het Oosthuizen glo in sy motor geklim en gery.
Die 23-jarige wat aangerand is, is oorspronklik van Bloemfontein, maar woon deesdae in Pretoria.
“Ek sal regstappe oorweeg nadat ek videomateriaal van Barba’s onder oë gehad het.”
Michael Horak, hulpafrigter van die Cheetahs, het Maandag gesê nie hy of die unie dra kennis van die voorval nie.
“Ons kry nie vir Coenie in die hande nie.”
Mario Kleovoulou, eienaar van Barba’s, het nie teen druktyd op boodskappe gereageer nie.
Volg Nuus24 op Twitter
- Volksblad