Bok-helde praat 14-jarige moed in
2010-09-03 09:25
Volksblad
Bloemfontein - ’n Jong rugbyspeler van Bloemfontein het sy slegste én beste dag tot nou toe in een week beleef toe sy Springbok-helde hom ná ’n hartoperasie in die hospitaal kom moed inpraat het.
Marius Louw (14), flank van Grey-kollege (Sekondêr) se o.15A-span, is deur die Bokke Pierre Spies en Flip van der Merwe in die Life-Rosepark-hospitaal besoek twee dae nadat hy geopereer is.
Sy ma, Roselle, sê daar is onlangs bevind Marius het ’n vergroeiing in die aorta wat die bloedvloei na die hart onder groot druk plaas.
Hy het Maandag ’n opehartoperasie ondergaan om die vlies te verwyder.
Die operasie is deur die hartchirurg prof. Francis Smit uitgevoer en was ’n groot sukses. Prof. Steven Brown was die kardioloog.
“Marius het die laaste paar wedstryde ’n pyn in die bors ontwikkel. Eers is gedink hy het moontlik ’n probleem met die slukderm, maar nadat sonars en ’n angiogram gedoen is, is vasgestel dat hy ’n vergroeiing in die aorta het.”
Sy pa, Marius, het gistermiddag gesê dit was vir sy seun ’n “groot voorreg” dat die Bokke hom besoek het. Spies is sy groot held en Van der Merwe was soos hy ’n leerling aan Grey.
Marius kan al Vrydag ontslaan word.
Spies het ’n DVD met sy motiveringsboodskappe aan Marius oorhandig met ’n boodskap op waarin hy hom aanmoedig om te bly glo en altyd vasberadenheid ten toon te stel.
“Dit was ’n wonderlike gebaar deur die twee Springbokke. Aanvanklik was die beslissing dat Marius nie weer rugby sal kan speel nie. Dit was ’n groot skok, want hy wou rugby sy loopbaan maak. Hy moes dit én die hartoperasie verwerk.”
“Dit het egter só goed gegaan dat daar ’n moontlikheid is dat hy weer kan speel.
“Dit gee vir hom rede op hoop,” het sy pa vertel.
Marius, ’n gr. 9-leerling, het elke jaar sedert graad een in die A-span gespeel.
Hy was in sy kort rugbyloopbaan al drie keer kaptein van sy span en het in gr. 7 (2008) die Cheetahs in die A-span (o.13) op die Cravenweek verteenwoordig.
Volg Nuus24 op Twitter
- Volksblad