Boeremag-lid: Ek is 'n nuwe mens
2013-01-28 15:14
Johannesburg – Die veroordeelde Boeremag-lid Kobus Pretorius het Maandag in die Pretoriase hooggeregshof gesê hy is nie dieselfde man as wat hy was toe hy in 2002 in hegtenis geneem is nie, het die SABC berig.
Pretorius het ter versagting van sy vonnis in die Boeremag-hoogverraad saak getuig. Hy het aan die hof gesê hy glo nie meer in die utopie van vier Boeremag-republieke nie.
Hy het gesê hy het in die tyd wat hy in die tronk was, nagedink oor sy lewe en dit waarin hy glo. Hy het alle bande met sy familie verbreek, omdat hulle hom nie met sy nuwe oortuigings aanvaar nie.
Die Boeremag-lede se poging om hul veroordelings vir hoogverraad om te keer, is verlede week vertraag.
Regter Eben Jordaan het die verhoor van die 20 Boeremag-lede tot dié week uitgestel. Dít volg ná 'n versoek deur Paul Kruger, wat verskeie van die veroordeeldes verteenwoordig, vir nog tyd sodat hulle verklarings kan nagaan en met hul regsverteenwoordigers vergader.
Al 20 Boeremag-lede is verlede jaar skuldig bevind op aanklag van hoogverraad nadat hulle probeer het om die ANC-regering omver te werp.
Kobus Pretorius, sy broers, Johan en Wilhelm, Herman van Rooyen en Rudi Gouws, is ook skuldig bevind op aanklag dat hulle oudpres. Nelson Mandela met 'n tuisgemaakte bom wou vermoor.
Hulle is verder skuldig bevind op aanklag dat hulle Claudia Mokone in 2002 in Soweto vermoor het. Mokone is dood nadat 'n stuk metaal sowat 400 m geskiet het ná 'n ontploffing en haar getref het terwyl sy in haar plakkershut geslaap het.
– Volg Nuus24 op Twitter
- SAPA
