Boeremag-broers se advokaat onttrek
2011-05-25 19:04
Pretoria - Die advokaat van twee van die Boeremag-lede wat vir verraad verhoor word, het Woensdag uit die verhoor onttrek weens ‘n “onversoenbare verbreking van vertroue” met sy kliënte.
Regter Eben Jordaan het Gert van Niekerk, die jongste van verskeie advokate wat dié broers, dr. Johan en Wilhelm Pretorius, verteenwoordig het, verlof toegestaan om uit die verhoor te onttrek, al het slotbetoë vir die verdediging Woensdag begin.
Johan Pretorius het in die hof gesê dié verbreking van vertroue het vroeër vandeesmaand tydens konsultasies met Van Niekerk aan die lig gekom. Dit het daartoe gelei dat hul advokaat gesê het hy het geen ander keuse as om te onttrek nie.
“Ons besef dit kom in ‘n baie laat stadium en ons bevind onsself in ‘n geregtelike tegniese mynveld.
“Ons kan nie die gronde vir die verbreking van vertroue onthul nie, aangesien die meeste van die inligting vertroulik is."
Johan Pretorius het gesê die twee verlaat nie hul reg op regsverteenwoordiging nie, maar voel dat die stelsel nie na hul behoeftes kan omsien nie.
Regter Jordaan het verlede jaar ‘n aansoek deur die twee broers en hul ander broer, Kobus, verwerp. Die aansoek het gevra dat die broers tot oorlogsgevangenes verklaar word.
Hulle het hulself as “soldate in ‘n bevrydingstryd” beskryf wat gewikkel is in ‘n gewapende stryd wat gemik is op selfonderhouding vir die “Boerevolk”.
Die drie broers het beken hulle was betrokke by aktiwiteite soos om tuisgemaakte bomme te vervaardig, wetende dat dié bomme by strategiese punte geplaas sou word.
Paul Fick, aanklaer, het verlede maand betoog dat al drie die beskuldigdes aan die hoofklag, hoogverraad, skuldig bevind moet word.
Hy sê hul sameswering om die regering omver te werp en dit met ‘n Boererepubliek te vervang, is steeds lewendig.
Twee van die oorspronklike 22 beskuldigdes – Herman Scheepers en Frederick Boltman – is dood sedert die verhoor agt jaar gelede begin het.
Die verhoor gaan Donderdag voort.
- Volg Nuus24 op Twitter
- SAPA