Boeremag-beskuldigde hospitaal toe
2011-06-01 17:59
Pretoria - Die oudste beskuldigde in die Boeremag-verraadverhoor, Vis Visagie, is Woensdag na die hospitaal gehaas nadat hy in die beskuldigdebank inmekaargesak het.
Een van sy medebeskuldigdes, dr. Lets Pretorius, het die 72-jarige Visagie in die hof behandel, maar het gesê toetse sal uitgevoer moet word om te bepaal wat fout is.
Visagie, Mike du Toit, Herman van Rooyen, Tom Vorster en Rudi Gouws het Dinsdag uit die hof probeer ontsnap nadat hulle ‘n ammoniak-agtige sproei in die oë van die polisiebeamptes wat hulle bewaak het, gespuit het.
Van Rooyen het daarin geslaag om die straat in te hardloop, maar polisiebeamptes, met die hulp van veiligheidswagte en motoroppassers, het hom naby die hofgebou gevang en hom na die hof teruggesleep.
Vorster, wat volgens sommige ooggetuies gegly en geval het, is in die voorportaal vasgetrek nadat hy blykbaar in ‘n struweling met ‘n vroulike polisiebeampte betrokke was.
Die ander drie is net buite die deur van hof GD in die Hooggeregshof-gebou in Vermeulenstraat vasgetrek.
Vier polisiebeamptes, insluitende die vroulike beampte wat Vorster voorgekeer het, en ‘n veiligheidswag is in die hospitaal opgeneem, maar is ontslaan nadat hulle behandel is.
Du Toit is Woensdag na die hof teruggebring, maar het in die selle gebly en gekla dat hy nie lekker voel nie.
Nog ‘n beskuldigde, Kobus Pretorius, het gekla dat hy emosioneel onder druk is, nie sy psigiater kan sien nie en “nie soos dit kan aangaan nie”.
Visagie het inmekaargesak kort nadat een van die advokate vir die verdediging, Louisa van der Walt, haar finale slotbetoog gelewer het. Dit het daartoe gelei dat die verhoor weer uitgestel is.
Twee van die 22 Boeremag-beskuldigdes – Herman Scheepers en Frederick Boltman, is dood sedert die verhoor agt jaar gelede begin het.
Die toestel waarmee die voornemende ontsnappers die polisiebeamptes gespuit het, is in neussproei-botteltjies en ‘n tandepastabuisie by die hof ingesmokkel.
- Volg Nuus24 op Twitter
- SAPA