Boeremag: 'Swakkeling' doen aansoek om borgtog

2012-08-27 07:27

Johannesburg – ‘n Rekenmeester van Pretoria wat beskryf word as die “swak” lid van die Boeremag, sal ná meer as 10 jaar in die tronk, in die Pretoriase hooggeregshof aansoek om borgtog doen.

Adriaan van Wyk se regsverteenwoordiger, Daan Moster, het verlede week aan regter Eben Jordaan gesê sy kliënt wil aansoek om borgtog doen.

Dit kom ná ‘n opmerking deur die regter dat hy wonder of nog tyd gevoeg moet word by die meer as 10 jaar wat Van Wyk reeds in die tronk deurgebring het terwyl hy verhoorafwagtend was.

Die regter het in sy uitspraak gesê dit sal in ag geneem word wanneer hy gevonnis word dat Van Wyk nie baie Boeremag-vergaderings bygewoon het nie en dat hy deur die ander as “swak” beskou is.

Van Wyk en sy medebeskuldigde, Jurie Vermeulen, was die enigste twee wat gesê het hulle sal gereed wees met argumente ten opsigte van volgende week se vonnisoplegging.

Prokureurs vir die res van die 20 beskuldigdes het aan die regter gesê hulle het tot Januarie volgende jaar nodig om voor te berei.

Al 20 die beskuldigdes is skuldig bevind aan hoogverraad in verband met ‘n regse komplot om die ANC-regering omver te werp.

Volg Nuus24 op Twitter  

- SAPA