Boere moet self teen werkers optree – Agri SA

2012-11-16 16:44

Johannesburg – Boere in die Wes-Kaap wie se werkers onwettig staak moet toegelaat word om self te besluit wat die mees geskikte optrede teen hulle sal wees, het Agri SA Vrydag gesê.

"Wetteloosheid en kriminele aktiwiteite kan nie geduld word nie en die skuldiges moet deur die gewone vervolgingsproses tot verantwoording geroep word," het Anton Rabe, hoof van Agri SA se arbeidskomitee, gesê.

Werkgewers moet besluit hoe om teen stakende werkers op te tree, omdat die staking onwettig is, het Rabe gesê.

Rabe het gesê Agri SA verwelkom besprekings wat daarop gemik is om 'n einde aan die staking te bring.

"Ons is toegewy aan konstruktiewe besluite wat die winsgewendheid en die volhoubaarheid van kommersiële boerdery oor die langtermyn kan verseker."

Rabe het verder gesê partye moet saamwerk om sakevertroue en gemoedsrus te herstel sodat die land se beeld herstel kan word.

Plaaswerkers in De Doorns staak sedert verlede week en eis 'n daaglikse loon van R150 en beter werkstoestande. Dié staking het vandeesweek na ander dorpe uitgekring.
       
– Volg Nuus24 op Twitter

- SAPA