Boere 'magteloos'
2012-01-24 08:00
André Damons en Willem van der Berg
Bloemfontein – Die splinternuwe grensheining wat Vrystaatse boere aan die grens met Lesotho oprig, word feitlik oornag deur stropers vernietig.
Vrystaat Landbou (VL) het pas ’n hofaansoek ingedien waarin hy vra dat die regering aan minagting van die hof skuldig bevind moet word omdat hy sy pligte langs die grens versuim.
Luidens ’n skikking in Junie 2010 tussen VL en die regering sal ’n nuwe grensheining opgerig, die grenspad herstel word en die polisie die grens patrolleer. Dié ooreenkoms is ’n bevel van die hof gemaak. VL voer nou aan die regering kom dit nie na nie.
Stef Buys, ’n boer van die plaas Seville naby Wepener, sê sowat die helfte van die 8km lange lemmetjiesdraadheining van R30 000 wat hy op sy plaas opgerig het, is vernietig. Buys en ander boere sê hulle is magteloos.
Hiermee saam sou die regering ook die grenspad van sowat 487 km herstel en die grens beveilig. Net sowat 50 km van die pad is egter herstel, sê Cobus Breytenbach, voorsitter van VL se veiligheidskomitee.
“Hoewel die regering sekere aspekte van die oorspronklike skikking nagekom het, kom hulle nie hul verantwoordelikheid na om die grensboere te beveilig nie.
“Hulle het wel die heining gespan, maar dit help nie jy span net die draad, maar beveilig dit nie.”
Buys sê hy en ander boere is raadop. “Ons het nou private veiligheidswagte aangestel, want ons het lanklaas die weermag gesien patrolleer.” Die veiligheidswagte jaag hom sowat R25 000 per maand uit die sak.
Boere sê Lesotho-burgers vernietig weekliks grensheinings om hul vee onwettig in Suid-Afrika te laat wei, of hulle steel groot hoeveelhede weiding.
Die weermag het verlede jaar by die polisie oorgeneem op die grens en het belowe sake sal verbeter. “Dit was net ’n gepraat. Ons sien nooit hul patrollies nie. En om hierdie probleem te keer sal jy elke paar meter iemand moet hê,” sê Buys.
Volg Nuus24 op Twitter
- Volksblad