Boere, maak ’n plan vir werkskep, vra Patel
2011-02-23 08:52
Somerset-Wes. – Die uitdrukking “ ’n boer maak ’n plan” het die boerderygemeenskap nog altyd goed omskryf en daarom wil die regering hê die land se wit en swart boere moet planne maak om die regering te help om nuwe werkgeleenthede te skep.
So het Ebrahim Patel, minister van ekonomiese ontwikkeling, Dinsdagmiddag hier op Agri SA se konferensie gesê.
Dele van sy toespraak was in Afrikaans.
Hy het ’n beroep op boere gedoen om in ’n vennootskap met die regering saam te werk en te help om die land te ontwikkel.
Die afgelope tien jaar het 400 000 werkgeleenthede in die landbousektor verlore gegaan.
Patel het gesê die regering sal in die volgende paar maande met Agri SA-leiers vergader oor praktiese maniere om gestalte te gee aan die samewerking tussen die regering en die boere.
Daar moet onder meer maniere gevind word hoe om kos goedkoper te produseer, kleinboere deel te maak van die hoofstroom-landbou en die werkomstandighede te verbeter van mense in die landbousektor.
Die minister het gesê grondhervormingsmodelle moet ook ontwikkel word wat sal verseker dat kleinboere hul produkte mededingend kan bemark.
“Aan die ander kant is ons gretig om met kommersiële boere saam te werk om die onnodige koste weens transformasie te verminder.
“Dit sluit in die vertragings in lisensiëring van water en grondeise,” het Patel gesê.
“Ons ondersteun ook hoër produktiwiteit deur die verbetering van infrastruktuur, finansiering en bemarking. Maar ons kan nie die een of die ander doen nie.
“Ons het ’n kombinasie nodig wat groei, beleggings in die landbousektor, produksie en uitvoer steun, terwyl ons voortdurend die lewensbestaan verbeter van die oorgrote meerderheid mense in die bedryf,” het Patel gesê
“Ons het meer beleggings in die landbou nodig om werk te skep en markte om ons produkte te verkoop.”
Die regering sal help om die regte beleggingsklimaat te skep.
Dit sal onder meer gebeur deur toe te sien dat grondhervorming op ’n ordelike manier gebeur, dit volgens die oppergesag van die reg geskied en mense wat van hul grond afstand moet doen behoorlik daarvoor vergoed word.
Salam Abram, veteraan-parlementslid van die ANC, het aan Patel gesê hy het saam met die Afrikaners grootgeword: “Kyk, minister, die Afrikaner kan bedonnerd wees, maar aan die anderkant ook grootmoedig.
“Kry hulle aan jou kant.”
Volg Nuus24 op Twitter
- Beeld