Boere kla hul ly skade oor riool in rivier
2010-09-10 08:08
Pretoria - Die Tshwane-metroraad sê hy weet nie daarvan dat rioolwater by die Rooiwal-rioolwerke, noord van Pretoria, in die Apiesrivier vloei nie.
Boere in dié omgewing voer aan dat rioolwater die laaste paar maande by die aanleg in die rivier loop.
’n Amptenaar by Rooiwal het vandeesweek aan Beeld bevestig dit gebeur “van tyd tot tyd”, gewoonlik wanneer een van die pompe onklaar raak.
“Ons het dan net te veel riool en het geen ander keuse nie.”
Boere beweer van hul varke en hoenders het die afgelope ruk weens die water gevrek.
Meer as 500ha is in dié distrik onder besproeiing.
Daar was ’n onaangename reuk naby die rivier by Beeld se besoek vandeesweek.
Tessa Ernest, Tshwane se burgemeesterskomiteelid vir landbou en omgewingsbestuur, sê sy is nie bewus van enige probleme by Rooiwal nie.
Nico Struwig, ’n boer wat ’n kontrak het om ’n sekere kwota groente aan ’n bekende maatskappy te lewer, sê die gehalte van die rivier se water kwel boere in die omgewing baie.
Struwig sê sy besproeiingspomp wat water na sy lande pomp, verstop gereeld weens die “suiwer riool”.
“As ek nie water het nie, staan my boerdery stil. As jou diere begin vrek en jy ly skade, is daar groot probleme.”
Volgens Struwig, wat daagliks met die water in aanraking kom wanneer hy sproeiers herstel, sweer stukkende plekkies aan sy hande die laaste ruk en vat lank om gesond te word.
“Wat nog meer kommerwekkend is, is die gedagte dat die Apies verder af deur Hammanskraal vloei, waar kinders in die somer daarvan hou om in die rivier te swem.”
Hannes Coetzee sê visse het ’n ruk gelede op ’n streep in ’n dam op sy hoewe gevrek.
Hy vermoed dit is weens die rivier se besoedelde water.
Walter Leibrandt, ’n groenteboer digby die rioolwerke, sê sy plaas kry Tshwane “se gemors heel eerste”.
“Ons pompe gee gereeld moeilikheid weens die riool wat in die rivier afkom.”
Ernest het gesê sy sal probeer vasstel of daar wel probleme by die rioolwerke is, maar kon teen druktyd nie weer vir kommentaar bereik word nie.
- Beeld