Boere kan nie teen aanvalle gewaarsku word – Agri SA
2011-08-07 06:44
Die gebrek aan betroubare, amptelike statistieke oor plaasmoorde maak dit onmoontlik vir boere om tendense en die ware omvang van die probleem te peil.
So het Kobus Visser, Agri SA se direkteur van korporatiewe skakeling, gesê.
“Ons kan ons lede ook nie oor brandpunte waarsku nie.”
Die land is geruk deur ’n vlaag van grusame plaasmoorde die laaste tyd in die Vrystaat.
Dit sluit in die moorde op die Potgieter-gesin, Attie, Wilna en Wilmientjie, in Desember 2010 naby Lindley; Helgard Muller in Januarie op sy plaas naby Frankfort en die afgelope week is Thinus Uitenweerde in ’n vlak graf gegooi en gestenig. Sy verlamde vrou en bejaarde ma is ook aangeval.
Pieter Groenewald, parlementslid van die VF+, het gesê plaasmoorde word nie afsonderlik aangedui nie, maar bloot as “’n moord” deur die polisie aangeteken.
Plaasaanvalle word volgens hom as “gewapende rooftogte” aangedui.
Die nasionale kantoor van die polisie het teen druktyd nog nie die stelsel aan Rapport verduidelik nie.
TLU SA maak op sy lede en die media staat om sy statistieke by te werk.
“Dit kan baie meer wees, maar beslis nie minder nie,” het Henk van de Graaf, assistent-hoofbestuurder van TLU SA, gesê.
TLU SA se statistieke vir die jaar sover toon 42 aanvalle op plase landwyd waarin 25 mense vermoor is.
Dit is minder as verlede jaar toe daar volgens die TLU SA se syfers van Januarie tot Augustus 83 aanvalle was waarin 47 mense dood is.
Chris van Zyl, TLU SA se hoof van landelike veiligheid, het gesê dié statistieke is konserwatief.
“Daar is gebiede waar ons nie lede het nie en as die media nie daaroor berig nie, kom ons nooit te hore van aanvalle nie.”
Hy is skepties oor die daling in die statistieke: “Die jaar is nog nie verby nie...”
André Botha, Agri SA se voorsitter van landelike veiligheid, het gesê hoewel die statistieke nie noodwendig akkuraat is nie, skryf hy die afname toe aan die “politieke wil” van mnr. Nathi Mthethwa, minister van polisie. “Daar is ’n beleid ontwikkel en ’n strategie ingestel.”
Botha het gesê Mthethwa het die leiding geneem en die polisie het nou verantwoordelikheid aanvaar vir die veiligheid in landelike gebiede.
Hy is bekommerd oor die wreedaardigheid van die moorde.
Van Zyl het dit beaam: “Die manier waarop ’n slagoffer vermoor word, dra ’n eie boodskap.
“Dis die ergste mate van wreedheid.”
– Volg Nuus24 op Twitter.
- Rapport