Boere haal kankerlyer se oes van die lande
2009-11-29 13:37
Oom Angus Buchan het aan hom gesê die Here gaan sy kankerdiagnose gebruik om sy gemeenskap bymekaar te bring. En só het dit ook gebeur…
Mnr. Jurianne Schreuder (38), Buchan se seremoniemeester, het Woensdag aan Rapport vertel hoe 19 medeboere sy oes van die land kom haal het nadat ’n kankergewas hom platgetrek het.
Schreuder, ’n aartappel- en koringboer van die plaas Theefontein, moes sowat twee maande gelede ’n operasie ondergaan waarin twee gewasse – waarvan een kanker was – uit sy bobeen verwyder is. Hy moes daarna 33 bestralings kry.
“Dit was ’n geweldige uitdaging vir my omdat die gewas in my boud was. Ek het baie met myself geworstel oor wat ek sou doen.”
Die volgende oomblik het sy vriend Jaco Slabbert gesê hulle wil ’n oesdag reël en dat boere in die omgewing bereid is om te help.
En verlede Saterdag het 19 boere by Theefontein aangekom met hul trekkers vol diesel – gereed om te oes.
Volgens Schreuder het die boere op een dag 300 ha en 1 000 t koring geoes.
“Dit was vir my ’n bonatuurlike gevoel om te weet soveel mense gee vir my om,” sê Schreuder.
“Baie mense dink ons staan alleen in tye van nood, maar ek het die naweek ervaar hoe mense werklik omgee. Ek het later begin skuldig voel dat mense my kom help het.”
Hy sê die boere het in een dag gedoen wat hom langer as ’n week sou geneem het en het nie ’n sent gevra nie. Een boer het al vyf sy trekkers gebring – as Schreuder hom vir sy arbeid en diesel moes betaal het, sou dit R40 000 beloop het.
Slabbert het gesê hy sal dit enige tyd weer vir Schreuder doen. Die twee mans ken mekaar sedert hulle in doeke was.
“Die boere het dit uit hul harte uit gedoen omdat Jurianne altyd tyd het vir sy medemens.”
Buchan het gesê dit is ’n fantastiese herlewing en bewys dat die Here deur mense werk. “Toe ek hoor wat gebeur het, het dit my diep geraak.”
- Rapport
Vir meer hieroor, besoek Rapport.