Boere gewillig om te onderhandel

2013-01-11 08:20

Worcester – Sommige boere het tot salaris-onderhandelings met vakbonde ingestem nadat betogings in dele van die Wes-Kaap weer gewelddadig geraak het.

“Hierdie besprekings is apart van die onderhandelinge wat ons met Agri SA gehad het,” het Tony Ehrenreich, Wes-Kaapse sekretaris van die vakverbond Cosatu, aan verslaggewers gesê.

Hy sê die ooreenkoms betrek boere en sommige groepe.

Gerhard de Kock, voorsitter van die groep Cape Orchards, sê hy het 28 boere uitgenooi na 'n vergadering wat Vrydag sal plaasvind.

De Kock verteenwoordig 12 plase in die Hexriviervallei by De Doorns, wat die kern was van die gewelddadige skermutselings tussen die polisie en stakende seisoenswerkers.

Die polisie het Donderdag 'n waterkanon, rubberkoeëls en skokgranate gebruik in 'n poging om honderde stakers uiteen te jaag.

Polisiebeamptes is by tye met klippe bestook.

Volg Nuus24 op Twitter

- SAPA