Boere eis plan van provinsiale regering oor waterkrisis
2010-11-15 08:00
Die Burger
Kaapstad - Die krisis in Suid-Afrika is nie grond nie, dit is water.
Wes-Kaapse boere wil dringend met die provinsiale regering vergader oor dié waterkrisis, het Carl Opperman, uitvoerende hoof van Agri Wes-Kaap, gister by navraag aan Die Burger gesê.
“Ons wil ’n plan hê oor hoe waterbronne bestuur gaan word in die toekoms, hoe riviere oop en skoon gehou gaan word en op watter maniere die impak van plakkerskampe op rivieroewers verminder kan word. Rioolwerke moet ook voldoen aan veiligheidsvoorwaardes om waterbesoedeling te keer.”
Watertekorte bly ’n realiteit in die Wes-Kaap, het die Wes-Kaapse minister van plaaslike regering, omgewing en toerisme, Anton Bredell, gesê. Die gehalte van water in riviere is ook besig om baie agteruit te gaan.
Maar die droogte knak nie net boere nie. Dorpe se watervoorrade droog op en selfs in die Skiereiland is inwoners gemaan om water te bespaar.
In Beaufort-Wes het die krisis met die dorp se dam wat opgedroog het, vererger. Die boorgatwater raak ook minder en daar word nou met die weermag gereël om water aan te ry. Ook in Dysselsdorp en De Rust dreig ’n watertekort. Knysna en Bitou het slegs drie tot ses maande se watervoorraad, het Bredell gewaarsku.
Vrydagaand het Laingsburg se dorpswater ook opgedroog. Volgens Bredell is daar fonteinwater, maar die pyp waarmee water na die dorp gelei word, is te dun.
In Kaapstad het die stadsraad gewaarsku dat mense in die suidelike deel van die Skiereiland water moet bespaar. Die laer as gemiddelde reënval die winter het daartoe gelei dat die Steenbrasdam en damme bo-op Tafelberg en by Simonstad se vlakke laag is.
Die Kleinplaasdam is slegs 57% vol ná die winterreën en die Lewis Graydam slegs 32% vol.
Inwoners van Vishoek,Clovelly, Sun Valley en Ocean View tot by die suidelik punt van die Skiereiland moet water bespaar, want indien daar nog ’n droë winter volg, sal dié damme reeds leeg wees.
Inwoners oor die hele Kaapstad is ook deur die stadsraad daaraan herinner dat gesuiwerde water nie tussen 10:00 en 16:00 gebruik mag word om tuine en grasperke nat te lei nie.
Om alles te kroon, gaan inwoners van die Kaapstad-metropool en die Weskus van vandag af behoorlik weet dit is droog en warm. Temperature van tot 40°C word verwag. Mense is ook gewaarsku teen ’n erge brandgevaar.
Volg Nuus24 op Twitter
- Die Burger