Boere-Viking val monument aan
2010-11-07 13:03
Rapport
Die sogenaamde Boere-Viking sê sy godsdienstige oortuigings het hom genoop om die gedenknaald van die Balmoral-konsentrasiekampmonument naby eMalahleni (Witbank) stukkend te kap.
Die “penis van Satan” hoort nie op ’n “Boere-monument” nie, het Günther Jurgens Kotzé Donderdag aan Rapport gesê.
Volgens die 32-jarige Kotzé, wat op borgtog en onder huisarres is nadat hy onlangs saam met oudkmdt. Willem Ratte in hegtenis geneem is, is obeliske simbolies van die merk van die dier en daarom moes hy die bepaalde gedenknaald volgens die derde gebod in die Bybel vernietig.
Hy het dit sowat twee weke gelede “op ’n dag van boetedoening” ná 15 dae in die tronk gedoen.
Hy, Ratte en ander word onder meer aangekla van die onwettige besit van wapens en dwelmhandel.
Kotzé werk op ’n plaas vir Ratte deur onder meer die kombuis skoon te hou en by die Volksmoord-museum toesig te hou. Die kerkhof is langs die museum.
Kotzé het foto’s van en verduidelikings oor sy verwoesting van die gedenknaald op sy Facebook-blad geplaas en volgens hom het hy dit ook per e-pos aan mense gestuur.
Hy sê hy behoort nie aan ’n kerk nie, maar is ’n “Sewe”, iemand wat Vrydagaande en Saterdae as die Sabbat gedenk.
Dit is net hierdie mense wat volgens hom “die groot verdrukking” gaan oorleef wat op pad is.
Dr. Jackie Grobler, kultuurhistorikus en kenner van konsentrasiekampe, het die beskadiging van die monument as “ ’n tragedie” bestempel.
“Dit maak my hartseer as ons mense ons eie monumente skend. Dit is ’n simptoom van ’n verwarde gemeenskap.”
Grobler sê verskeie Anglo-Boereoorlog-monumente, maar ook uit die ZAR-tyd voor die oorlog bestaan uit gedenknaalde, soos die Vroue- en die Paardekraalmonument.
“Ek dink nie destyds se mense het énige godsdienstige verbintenis aan gedenknaalde geheg nie. Dit was bloot die teksboekvoorbeeld van hoe ’n monument moet lyk.”
Genl.maj. Gert Opperman, uitvoerende hoof van die Erfenisstigting, het die voorval by die SA Erfenishulpbronagentskap aangemeld.
“Sulke wandade in die naam van ekstremistiese geloof kan nie geduld word nie, nie in Afganistan nie en ook nie in Suid-Afrika nie,” sê hy.
Die Balmoral-terrein is in onderhandelings tussen die stigting en die agentskap as een van 15 prioriteite uitgewys.
Die stigting wil, met staatsfinansiering, die instandhouding van
alle konsentrasiekamp-kerkhowe van die Anglo-Boereoorlog, burgergrafte en krygsgevangenekampe in die buiteland oorneem.
’n Ooreenkoms hieroor kan binne dae onderteken word.
Troy Phili, die agentskap se bestuurder van begraafplase en grafte, sê alle grafte van slagoffers van konflik is beskermde terreine.
Verder is die beskadiging van ’n monument kragtens die Wet op Erfenishulpbronne ’n oortreding wat deur die polisie ondersoek moet word.
Die agentskap doen sy eie ondersoek na die voorval en oorweeg of hy hom as klaer wil voeg in die klag wat Piet Rudolph Woensdag namens die Orde Boerevolk by ’n Pretoriase polisiekantoor teen Kotzé ingedien het.
Volgens kapt. Leonard Hlati, ’n polisiewoordvoerder in Mpumalanga, was die dossier teen Donderdag nog nie na eMalahleni oorgeplaas nie.
- Rapport