‘Boere-Viking’ gestraf
2010-12-02 08:16
Gerhard Pretorius
Johannesburg - Günther Kotze (32), die sogenaamde “Boere- Viking”, het skuld beken op aanklag van opsetlike saakbeskadiging nadat hy ’n gedenknaald van ’n boeremonument afgebreek het.
Kotze is Woensdag in die landdroshof in eMalahleni (Witbank) gevonnis tot ses maande tronkstraf, opgeskort vir vyf jaar.
Hy het erken hy het die gedenknaald van die Balmoral- konsentrasiekampmonument naby eMalahleni stukkend gekap.
Kotze, wat homself verdedig het, het gesê hy is baie jammer oor wat hy gedoen het, al was dit volgens sy geloofsoortuiging reg om die naald af te breek.
“Die gedenknaald is ’n obelisk en ’n belediging vir my geloof. Dit behoort met ’n kruis vervang te word.
“Ek is wel jammer oor wat ek gedoen het. Ek het op daardie oomblik nie gedink wat ek gedoen het nie.
“Ek en twee ander mans het die monument gaan regmaak,” het Kotze in die hof gesê.
Dit het R6?000 gekos wat deur oudkmdt. Willem Ratte en Eugene Bekker betaal is.
Kotze, Ratte en Bekker staan met sewe ander tereg op aanklagte van onder meer diefstal, dwelmhandel en die onwettige besit van vuurwapens en ammunisie.
Hulle is tydens ’n polisieklopjag by ’n jeugherberg in Balmoral in hegtenis geneem.
Landdros Daleen Venter het gesê hoewel Kotze die reg het tot vryheid van geloof, het hy nie die reg om ander se eiendom te beskadig nie.
“Jy moet verstaan dat daar ander gelowe is en dat hulle ook gerespekteer moet word. Jy het egter ook die volste reg om jou geloof te beoefen.
“Ek kan sien jy berou jou dade en die hof neem dit in ag as dit by vonnisoplegging kom.”
Nadat Venter hom tot ses maande tronkstraf, opgeskort vir vyf jaar, gevonnis het, het Kotze met ’n groot glimlag by die hof uitgestap en sy oom, mnr. Louis Viviers, omhels.
Kotze het aan Beeld gesê dat die tronk “soos ’n vakansieoord is met k***erige kos en geen kamerbediening nie”.
- Beeld