Boer ‘weerloos’ sonder vuurwapen
2009-12-14 07:22
Jan Gerber
Stellenbosch -’n Bolandse boer wat tydens ’n gewapende roofaanval op hom en sy sekretaresse, ’n rower op sy plaas doodgeskiet het, voel nou erg weerloos nadat die polisie sy vuurwapen afgeneem het terwyl die oorledene se drie makkers steeds op vrye voete is.
David de Villiers (39) van die plaas Flenterskloof by Simondium buite die Paarl, en sy sekretaresse is Vrydag omstreeks 15:40 in hul kantoor deur vier rowers oorval en met maskeerband vasgemaak.
Hulle het daarin geslaag om los te kom, waarop De Villiers sy vuurwapen bekom en een van die rowers wat op hom afgestorm het, doodgeskiet het. Die ander rowers het gevlug en is steeds soek, het kapt. Frederick van Wyk, ’n polisiewoordvoerder, gister gesê.
Volgens hom is beslag op De Villiers se vuurwapen gelê sodat dit vir ballistiese toetse gestuur kon word.
De Villiers het aan Die Burger gesê die beslaglegging op sy wapen laat hom met ’n gevoel van weerloosheid. “Sou iemand nou wou terugkom om wraak te neem omdat sy maatjie nie saam met hulle weggekom het nie, het ek geen manier om my te verdedig nie.
“In die eerste plek is die vuurwapen gebruik omdat dit ’n geval van lewe of dood was.”
Van Wyk het by navraag aan Die Burger gesê die polisie verleen nie 24 uur persoonlike beskerming nie, maar sigbare patrollering sal gedoen word.
Volgens De Villiers het die polisie Vrydag aanbeveel dat hy en sy sekretaresse traumaberading kry.
“Vir my sekretaresse sal ek dit beslis moet laat doen. Sy is stukkend. Sy was alleen in die kantoor. Ek was nog nie daar toe die rowers haar met maskeerband aan die tafel vasgemaak het nie.
“En toe hou hulle ’n vuurwapen teen haar kop en eis dat sy die kluis moet oopmaak. Maar sy kon nie. Hulle weet mos nie of sy regtig nie die kode ken nie. Dit was vir haar baie erg.”
Die polisie het ’n moorddossier geopen. “Ná ’n volledige ondersoek sal die saak na die vervolgingsgesag verwys word vir ’n beslissing,” het Van Wyk gesê.
Hy het gesê die identiteit van die rower wat gesterf het is bekend, maar dit kan vir ondersoek-doeleindes nie nou bekend gemaak word nie.
- Die Burger