Boer, voorman vrygespreek
2010-06-16 11:02
Johan Brits
Bloemfontein – Weens swak getuienis is ’n Kroonstadse boer en sy plaasvoorman wat in die tronk beland het nadat hulle ’n vermeende plaasaanvaller glo ontwapen en in die proses beseer het, in die hof hier op aanklag van aanranding vrygespreek.
Die staat kon nie bo redelike twyfel bewys Chris Grobler (23) en sy werknemer Eugene Lloyd is aan dié misdryf skuldig nie.
Leeu Monyamane (43), die vermeende aanvaller wat dié klag teen Grobler en Lloyd ingedien het, het tydens die verhoor sy weergawe van die gebeure op dié dag in Maart verskeie kere verander.
Ook dít het meegebring dat landdros Neels de la Rey die aanklagte teen Grobler en Lloyd ingevolge art. 174 van die Strafproseswet laat vaar het.
Christo Grobler, Grobler se pa, het vroeër aan Volksblad gesê Grobler jr. het die polisie laat kom toe Monyamane, ’n “gewese” plaaswerker, “moles” op die plaas Labri gemaak het. Die polisie het die man verwyder.
Die volgende aand was Monyamane terug.
Toe Grobler jr. hom glo weggewys het, het Monyamane na bewering ’n mes uitgepluk en na Grobler jr. gesteek.
Grobler jr. het die mes afgevat en die aanvaller het hard met die aarde kennis gemaak.
Monyamane het glo sy hand gebreek en ribbes seergemaak.
Monyamane het Grobler jr. by die Heuningspruit-polisie gaan verkla en Grobler jr. en Lloyd is in hegtenis geneem.
Dié twee het ’n nag in die tronk op Koppies deurgebring. Hulle is op borgtog van R500 elk vrygelaat.
Terwyl die Groblers bitterlik kwaad was vir die Heuningspruit-polisie, het ’n groot groep van die gemeenskap hul by dié polisiekorps en in besonder hul “Black Barbie” – die troetelnaam van die Heuningspruitse bevelvoerder, kapt. Thenjiwe Mkhumbeni – geskaar.
Hulle het gemeen die mans sou nie sonder goeie rede in hegtenis geneem gewees het nie.
- Volksblad