Boer verloor haar spogplaas
2009-09-02 10:35
Karen Ebersohn
Bloemfontein – ’n Handjievol brandmaer beeste, skape en varke is al wat oor is van die voormalige spogplaas, Vergesocht, buite Bloemfontein.
Die regering het die plaas aan ’n vroueboer verhuur.
Kero (Karoline) Kgobe (46), wat deur die Vrystaatse landboudepartement as Vroueboer van 2008 aangewys is, is deur die departement van landelike ontwikkeling en grondsake van Vergesocht afgesit.
Eergister is Kgobe se luukse leerbanke, ’n groot plasmaskerm-TV, ontwerpersklere, rekenaars en stoele deur die Bloemfonteinse balju uit die eens luukse plaashuis verwyder.
Haar afsetting kom ná ’n bevel van die hooggeregshof in Bloemfontein. Kgobe moes reeds teen 25 Julie van die plaas gewees het, maar het nie verhuis nie.
Tussen Kgobe se huisinhoud het ses uitgeteerde honde rondgesnuffel. Toe die kombuis-inhoud deur die balju uitgedra is, het die honde ’n brood met plastieksak en al gegryp en verorber.
“Ek het nie vir die plaas gevra nie. Waarom het hulle dit vir my gegee en neem hulle dit weer weg? Dit is ’n goeie voorbeeld van hoe die regering besig is om sy mense in die steek te laat,” het ’n ontstoke Kgobe gesê.
Sy het gesê die departement van grondsake het haar nie eens alternatiewe verblyf aangebied nie.
“Wat is ek nou veronderstel om te doen? Ek het nêrens heen om te gaan nie.”
Gani Ramagaga, uitvoerende hoof van Vrystaatse landelike ontwikkeling en grondsake, het gesê daar was baie geldige redes waarom Kgobe gevra is om die plaas te verlaat. Sy het ’n kroeg op die plaas begin en drank verkoop. Dit het onder meer gelei tot die moord op ’n vrou deur ’n plaaswerker.
Sy het ook gedurig met haar bure baklei, haar plaaswerkers verhinder om hul werk te doen en het ook geëis ’n deel van die plaas moet op haar naam gesit word.
Ramagaga het gesê die departement se ooreenkoms met haar was dat sy ses maande lank op die plaas kon boer.
Haar kontrak is weens die misstappe nie hernu nie. Kgobe het geweier om die plaas te verlaat en die saak is na die hooggeregshof verwys, wat beslis het sy moet van die plaas af.
Ramagaga het gesê alternatiewe verblyf is aan haar gegee. Dit is ’n plaas, Portion 11, Westminster, Tweespruit. Sy is ook R30 000 gegee om daar te boer.
- Beeld