Boer verbied om ontsnapte krokodille te vang
2013-02-08 09:23
Johannesburg – Die departement van omgewingsake in Limpopo het die boer op wie se plaas duisende krokodille weggespoel het tydens die onlangse vloede verbied om krokodille in die Limpoporivier te vang, berig Beeld.
Zane Langman, van die Rakwena-krokodilplaas in die Pontdrif-gebied, het gister gesê hulle is besig met onderhandelinge met die departement.
“Hulle het vir ons gesê ons mag geen krokodille in die Limpoporivier vang voordat hulle toestemming gee nie omdat ons nie kan bewys die krokodille behoort aan ons nie.”
Die krokodille het wêreldwyd opslae gemaak toe sowat 7 000 van die 15 000 losgekom het toe die Limpoporivier sy oewers oorstroom het.
Langman het gesê sowat 3 000 van die krokodille is die afgelope drie weke op die plaas en in die omliggende gebied gevang. Die res van die krokodille is in die Limpopo en sytakke van dié rivier.
Wisani Shilenge, woordvoerder van die departement van omgewingsake, kon gister nie vir kommentaar bereik word nie.
Intussen het die Nasionale Dierebeskermingsvereniging (NDBV) in ’n verklaring gesê die manier waarop die krokodille gevang word, is “onmenslik”.
Nazareth Appalsamy van die NDBV het gesê inspekteurs het gesien hoe van die krokodille met skokstokke geskok word om hulle te vang.
Rakwena word die afgelope 15 jaar deur Langman se skoonpa, Johan Boshoff, bedryf.
Die krokodilvelle word na onder meer Italië uitgevoer. Van die krokodilvelprodukte word op die plaas verkoop. Krokodilvleis word ook plaaslik verkoop.
– Volg Nuus24 op Twitter
- SAPA
