Boer vas ná hy glo seun (14) doodskiet
2011-10-20 09:03
Polokwane – ’n Boer van Groblersdal, Limpopo, is op aanklag van moord in hegtenis geneem nadat hy glo ’n 14-jarige seun doodgeskiet het wat op sy plaas visgevang het.
’n 17-jarige seun is ook gewond in die voorval Dinsdag in die Krokodilbrug-gebied.
Piet Swart (57) is in polisie-aanhouding en sal vandag in die hof verskyn.
Lt.kol. Ronel Otto, provinsiale polisiewoordvoerder, het gesê Swart het Dinsdagmiddag laat vier seuns by ’n dam op sy plaas sien visvang.
Die seuns is tussen 14 en 17 jaar oud. Hulle woon blykbaar op ’n buurplaas, waar hul ouers werk.
Hulle het glo nie toestemming gehad om in die dam vis te vang nie en het weggehardloop toe hulle agterkom Swart het hulle raakgesien.
Otto het gesê Swart het daarna na bewering met ’n haelgeweer op die groep tieners geskiet.
Die 14-jarige seun is in die kop getref en die 17-jarige in die linkerhand.
Die ander twee seuns het weggehardloop.
Die boer het die twee gewonde seuns na ’n hospitaal in Groblersdal gevat.
Die 14-jarige is daar dood verklaar. Die ander seun se wonde is behandel en hy is ontslaan.
Swart is Dinsdagmiddag in hegtenis geneem en is sedertdien in die aanhouding in die polisieselle.
Otto het gesê hy sal Donderdag op aanklag van moord en poging tot moord in die landdroshof in Groblersdal verskyn.
– Volg Nuus24 op Twitter
- Beeld