Boer spring dood net-net vry
2010-01-15 10:34
Petrus Steyn – Een keer, twee keer, drie keer is die sneller getrek, maar nie ’n enkele skoot is afgevuur nie.
Jan van der Westhuizen (59), ’n melkboer in die distrik hier, het Donderdag gesê hy dank God dat nie een van die skote afgegaan het toe ’n inbreker hom wou doodskiet nie.
Van der Westhuizen bly saam met sy seun, GF, op die Houtnek-kleinhoewe.
Hy sê Donderdag voor 06:00 het hy en sy seun die huis verlaat. Van der Westhuizen het sy werkers opgelaai en is na die melkstalle terwyl sy seun na die plaas waar hy werk, vertrek het.
Van der Westhuizen sê hy moes ’n toilet besoek en is later terug na die huis.
“Ek het die deur oopgesluit en binnegegaan.”
Hy het dadelik onraad vermoed toe ligte in die huis aangeskakel was.
Boonop het hy drankbottels in die portaal opgemerk wat uit die drankkabinet in ’n ander vertrek gehaal is.
Hy was op pad na die kombuis toe hy die inbreker by sy dogter se kamerdeur sien staan het.
Die booswig het Van der Westhuizen se .38-rewolwer gehad.
“Wat soek jy in my huis,” het die boer gevra.
Die inbreker het geld gesoek.
Van der Westhuizen het nagenoeg R150 op die grond neergegooi.
Die inbreker het die eerste keer die sneller getrek.
Die boer sê hy kan nie die gevoel wat toe oor hom gekom het, beskryf nie.
“In daardie stadium (toe die skoot nie afgaan nie) het ek besef die Here is aan my kant.”
Die inbreker het Van der Westhuizen eers beveel om op die grond te lê en toe om sy dogter se kamer binne te kom.
“Ek het besluit hy sal skiet. Hy het al geskiet.”
Hy het na ’n ander kamer gehadloop.
Die inbreker moes volgens hom toe nog twee keer die sneller getrek het, maar weer eens het geen skoot afgegaan nie. Die boer het die ander kamer binnegestorm en die deur toegehou totdat die inbreker die hasepad gekies het.
Volgens hom het die inbreker die R150, asook sy seun se selfoon wat hy die oggend by die huis vergeet het, gesteel, maar die rewolwer buite die huis agtergelaat.
Die inbreker het ’n staaldeur oopgedwing en so toegang tot die huis verkry.
Die vermoede bestaan dat daar moontlik nog ’n inbreker in die huis was.
Van der Westhuizen sê nadat ’n werker hom in Desember met ’n panga wou slaan, het hy sy rewolwer saans in sy bedkassie gesit.
Hy het gisteroggend vergeet om die vuurwapen in die kluis toe te sluit en die inbreker het dit in die hande gekry.
Die boer sê toe die inbreker die eerste twee keer die sneller getrek het, was daar slegs doppies in die onderskeie kamers van die rewolwer.
Die derde keer het die hamer aan die agterkant vasgeslaan.
Hy dank sy Skepper dat hy nog lewe.
“As dit nie vir Hom was nie, was ek weg. Sy genade was daar, Sy hand in alles.”
Sers. Mmako Mophiring, polisiewoordvoerder, sê niemand is al in hegtenis geneem nie. Enigiemand met inligting kan die Petrus Steyn-polisiediens by 058-871-3200, of Stop Misdaad by 08600-10111 bel.
Van der Westhuizen se vrou, Chrissie (61), is drie jaar gelede weens hartversaking dood. Sy dogter, Hesmari, studeer aan die Universiteit van die Vrystaat (UV) in Bloemfontein.
- Volksblad