‘Boer soek vrou’ se bruid in hof oor kind
2011-12-18 07:15
Kaapstad – Gert Conradie en Maritza Laubscher van Boer soek ’n vrou-faam is Vrydag op Robertson getroud, maar geen wittebrood wag op die pasgetroudes nie.
Wat wag, is ’n regstryd vir Maritza.
Sy moet môre in die hof verskyn nadat haar eksman, Louis Laubscher van Moorreesburg, ’n dringende aansoek ingedien het om hul sewejarige seun vir die vakansie te kry.
Gert en Maritza het mekaar in die vierde reeks van Boer soek ’n vrou ontmoet, waarna hy haar in die laaste episode gevra het om te trou.
Louis en Maritza is in November 2010 geskei.
Die egskeidingsbevel bepaal die pa sal elke tweede naweek saam met die seun deurbring van regstreeks ná skool op ’n Vrydag tot 17:00 op ’n Sondag.
Die ouers moet toesig in die April- en Desember-Januarie- skoolvakansie deel.
Volgens Erik Louw van Basson & Louw Ing., die pa se prokureur, “word hierdie reëlings net deur Maritza van die tafel gevee”.
Hulle bring nou ’n dringende aansoek dat Louis sy kind vir die vakansie kan sien, waarna hulle wil hê ’n gesinsadvokaat moet ondersoek instel na ’n langtermynoplossing.
Tydens die verfilming van Boer soek ’n vrou moes Maritza Knysna toe gaan, maar sy het geweier dat die seun daardie naweek by sy pa bly.
Die seun het die naweek by sy ouma in Kaapstad deurgebring.
“Die bakleiery tussen Maritza en Louis gaan reeds lankal aan. Sy het hom alle toegang tot die kind geweier. Sy beweer ook Louis gee nie die kind se medikasie vir hom nie.
“Ek het dit onmiddellik in ’n brief reggestel, want Louis hét die medikasie gegee.”
Louw sê die pa is net so bekommerd oor die medikasie wat sy seun ontvang.
“Maritza, ’n aptekersassistent, het aan die pediater gesê die kind is buite beheer. Die sewejarige seun is nou op Risperdal en Ritalin.
“Die pa is nooit in die saak geken nie en hy volstaan daarby dat sy kind nié gedragsprobleme het nie,” sê Louw.
Monja Posthumus-Meyjes van Van der Spuy en Vennote, wat as prokureur vir Maritza optree, het navrae na Ernst Swart, die publisiteitsbestuurder van Boer soek ’n vrou, verwys.
Swart het Saterdagoggend gesê hulle wil nie nou enige kommentaar lewer wat die saak kan belemmer nie.
“Hier is ’n minderjarige kind betrokke wat beskerm moet word. Ons wil nie die storie vooruit loop nie – dis hoekom daar ’n hof en bekwame regters is.
“Die regsproses moet nou sy gang gaan.”
Oor die troue self sê hy dit was ’n “fantastiese troue” en dat Gert en Maritza baie gelukkig is.
Die regte van die troue is aan ’n gesinstydskrif gegee en die gaste is glad nie toegelaat om kameras saam te neem nie.
- Rapport