Boer skotvry ná trekker-voorval
2010-06-24 08:45
Johan Brits, Volksblad
Vrystaat – ’n Boer van Parys het Woensdag as ’n vry man uit die distrikshof gestap toe ’n aanklag van poging tot moord weens onvoldoende getuienis teen hom teruggetrek is.
Mbulelo April, ’n plaaswerker, het beweer Riaan van der Westhuizen, sy werkgewer, het in Januarie vanjaar met ’n trekker oor hom gery.
Volksblad verneem April het eers dae later op aandrang van ’n ANC-raadslid in die Ngwathe-munisipaliteit (Parys en dorpe) ’n klag ingedien.
April het ook met groot geskal sy weergawe aan die media vertel.
Luidens ’n Engelse dagblad het April gesê Van der Westhuizen het “op hom afgejaag en met die trekker omgestamp”.
Hy het verskeie beenbreuke opgedoen.
Die maande lange nagmerrie het tot ’n einde gekom toe die direkteur van openbare vervolging (DOV) in Bloemfontein opdrag gegee het om die aanklag terug te trek.
Van der Westhuizen se vorige hofverskyning was in groot omstredenheid gehul toe tientalle mense in opdrag van die burgemeester van Ngwathe teen die mishandeling van plaaswerkers voor die hof betoog het.
Die DA-koukus was erg omgekrap oor dié aanhitsing deur Max Moshodi.
Moshodi het kort voor dié hofverskyning op ’n raadsvergadering gesê raadslede moet na die hof opruk.
Moshodi het aan Volksblad bevestig hy het die byeenkoms voor die hofgebou gereël.
“Ek het ’n uitnodiging aan al die raadslede, selfs dié van die opposisie, gerig om voor die hof te betoog.”
Moshodi sê dié aksie is “niks nuuts” nie en dit is gereël om misnoeë met die omstandighede waarin plaaswerkers hulle bevind, te kenne te gee.
“Mishandeling in plaasgemeenskappe word nie geduld nie.”
Arnold Schoonwinkel, ’n DA-raadslid, het gesê dié aksie deur Moshodi word “betreur”. “Ons vind dit skokkend dat, terwyl die munisipaliteit in ’n benarde finansiële en administratiewe situasie sit, Moshodi sulke optogte reël.”
Betogers is glo met busse na die hofgebou aangery.
Van der Westhuizen het voor landdros Leshnee Pillay verskyn.
- Volksblad