Boer skiet glo sy vrou, homself
2010-08-17 08:13
Volksblad
Kestell - ’n Pa van vier dogters en suksesvolle boer in die distrik, het na bewering eers sy vrou en toe homself doodgeskiet.
Sers. Majang Mosupa, ’n polisiewoordvoerder, kon slegs bevestig dat twee mense albei met borswonde in hul bed in hul slaapkamer gevind is.
Die polisie wou op versoek van die familie nie kommentaar lewer nie.
Kol. Sam Makhele, provinsiale woordvoerder van die polisie, het bevestig dat ’n dogter van die egpaar Saterdag omstreeks 08:00 die polisie ontbied het.
Langs een van die lyke het ’n vuurwapen gelê.
Volksblad het deur lede van die gemeenskap verneem dat David Matlokotzi (56) glo eers sy 52-jarige vrou, Mabatho, en toe homself Saterdag in die oggendure doodgeskiet het. Die voorval het op die plaas Montabon plaasgevind.
Volgens ingeligtes was Matlokotzi ook ’n suksesvolle sakeman, wat ’n algemene handelaar op Qwaqwa bedryf het.
Die gesin het ook ’n huis daar gehad.
Hy het jare lank deeltyds die suksesvolle gemengde boerdery in die Kestell-distrik bedryf.
Hy was ’n gevestigde lid van die National Farmers Union (Nafu), asook die Organisasie vir Opkomende Rooivleisprodusente (Nerpo).
Die egpaar se jongste dogter, Kekeletso, wat nou wees gelaat is, is ’n gr. 2-leerling aan die Hoërskool Retief op Kestell se laerskoolafdeling.
Sy was glo tydens die voorval by die huis.
Abrie Beukes, skoolhoof, sê die dogters wat hier op skool was, was almal puik leerlinge. Hulle is egter reeds uit die skool.
Volgens hom was klein Kekeletso nie gister by die skool nie.
Beukes sê die familie het hom slegs Saterdag van die voorval ingelig en sou hom Dinsdag kom spreek.
Een van Matlokotzi se dogters het gister aan Volksblad gesê die familie wil geen kommentaar lewer nie.
“Dit is ’n familie-aangeleentheid. Dit het niks met die publiek uit te waai nie, wat hier gebeur het, is óns probleem.”
Die polisie ondesoek ’n saak van moord.
- Volksblad