Boer se vrou eis R4 miljoen van polisie
2011-10-17 09:11
Johannesburg – 'n Boer se vrou dagvaar die polisie vir meer as R4 miljoen vir die verlies van finansiële ondersteuning ná haar man se dood, berig Independent Online.
Kobus de Vries (54) van Babanango het op 20 Januarie vanjaar in 'n skietery met sowat 40 gewapende polisiemanne by sy plaashuis gesterf.
Rentia, sy weduwee, vat die minister van polisie hof toe om hom aanspreeklik te hou vir die dood op haar man.
In hofdokumente van deur Carel Taute, haar regsverteenwoordiger, ingedien is, eis Rentia, 'n veearts wat intussen na Somerset-Wes verhuis het, R4 008 000 van die minister. Sy eis ook rente op die bedrag.
Taute het gesê mnr. De Vries het jaarliks 'n bedrag van R200 000 aan sy vrou gegee. Sy het nie gewerk nie, maar is sedert haar man se dood genoop om 'n swakbetaalde werksgeleentheid te aanvaar.
Toe die nuus van mnr. De Vries se dood bekend gemaak is, het kol. Jay Naicker, polisiewoordvoerder, gesê die inligting tot sy beskikking toon dat De Vries doodgeskiet is toe hy op die plaaslike polisie en die taktiese reaksie-eenheid losgebrand het.
Die saak is nou by die kantoor van die staatsprokureur, wat 20 dae kans het om op die dokumente te reageer.
– Volg Nuus24 op Twitter
- SAPA