Boer 'raadop' oor onwettige plakkers

2012-07-29 07:36

Burgersfort – 'n Boer van Burgersfort in Limpopo sukkel al agt jaar lank om onwettige plakkers van sy grond af te kry en een van die plakkers het selfs 'n dubbelverdiepinghuis op sy plaas gebou, berig Rapport.

Roelof Joubert se buurman, Jacob Mohlala (88), is ook raadop oor veediefstal waarvoor hy dieselfde plakkers die skuld gee.

Die eerste plakkers het volgens die berig in 2003 op Dresden, Joubert se plaas van sowat 110 ha aangekom. Weens 'n watertekort word daar nie meer op die plaas geboer nie.

Joubert verhuur die geboue op die perseel aan sakelui.

Shaealegolo Kgwete, die plakkers se selfaangestelde leier, het intussen vir hom ’n dubbelverdiepinghuis op Joubert se grond gebou.

Joubert sê toe hy die eerste plakkers van sy grond wou afsit, het hulle gesê Kgwete het die grond aan hulle “verkoop”.

Ook Joubert se klagte van betreding by die polisie en pleidooie aan die Groter Tubats se plaaslike raad en die departement van landelike ontwikkeling en grondhervorming het op niks uitgeloop nie.

Die munisipaliteit het trouens in 2010 dienste aangelê na waar die plakkers en Kgwete woon.

Kgwete het gesê hy wil geen kommentaar lewer oor die aantygings teen hom nie.

– Lees meer hier

– Volg Nuus24 op Twitter