Boer praat oor tenkmoord
2009-08-26 06:52
Garnett Wicomb
Oudtshoorn - “Ek het tot by die plaashek gelieg, maar van nou af praat ek die waarheid.”
Só het mnr. Pieter Botes, die boer van Leeu-Gamka wat tereg staan op aanklagte van kinderverlating, verkragting en die moord op die 13-jarige Elizabeth Martiens, aan insp. Johannes Steyn gesê.
Dié getuienis het gister aan die lig gekom toe drie polisiebeamptes getuig het oor die bekentenis en uitwysings van Botes op sy plaas Weltevrede.
“Ons staan langs die kind,” het Botes aan insp. Jacobus Mouton gesê terwyl hulle in ’n Condor-bussie gesit het.
Volgens Mouton het hy nie verstaan wat Botes bedoel nie en hom verder uitgevra.
“Hy sê toe aan my die kind is in die tenk.”
Hy het twee ander polisiebeamptes, insps. Johan Rossouw en Johannes Steyn, hieroor ingelig, maar nie self in die tenk gekyk nie.
Steyn het gister in die hof hier getuig hy het Botes se woorde aan Mouton gehoor en na hom omgekyk.
“Botes het die woorde herhaal en hoewel hy dit nie gesê het nie, het ek van hom verstaan die kind is in die tenk.
“Dié woorde het deur my kop bly maal.”
Volgens Steyn se getuienis het hy daarna in die tenk gekyk en mensbeendere onder ’n stuk sinkplaat en blou lap sien uitsteek.
“Die voetjie en kop was duidelik sigbaar,” het Steyn gesê.
Ook insp. Andrew Wynne het gister getuig hoe geskok hy was oor Botes se bekentenis.
“Ek was so teleurgesteld dat ek eenkant toe gestap het, omdat ek ook kinders grootmaak,” het Wynne gesê.
Adv. Meg Allie is die staatsaanklaer en mnr. Willem Wagener verskyn namens Botes.
Regter Vincent Saldanha word bygestaan deur twee assessore, mnr. Clyde Avontuur en me. Lenie Smit.
- Die Burger