Boer moet buurman ná brand betaal
2011-09-14 09:01
Bloemfontein - 'n Boer van Frankfort moet aan sy buurman in die distrik van Heilbron R165 000 betaal nadat ’n brand vanaf sy plaas skade op sy buurman se plaas aangerig het, is in die Vrystaatse hooggeregshof by ooreenkoms tussen die partye beveel.
Waarnemende regter Johann Daffue het Dinsdag beveel dat Fred Bibbey van die plaas Diepfontein aan Izak Frederik Viviers van die plaas Modderfontein die geld moet betaal vir skade wat hy aan sy weiveld en omheinings op sy plaas gely het. Bibbey moet ook Viviers se regskoste betaal.
Die eis spruit uit ’n brand wat op 23 Junie 2008 op die plaas Brakoog in die distrik Heilbron ontstaan het.
Luidens die eis het dit by arbeidershuise op die plaas ontstaan.
In die eis word beweer dat Bibbey en sy werknemers nalatig was en nie die nodige brandbane om die arbeidershuise en plaas gehad het nie.
Luidens die hofstukke het Viviers skade van bykans R360 000 gely.
In sy verweerskrif ontken Bibbey dat hy nalatig was en beweer onder andere dat Viviers nalatig was deurdat hy nie enigsins of voldoende brandpaaie op die plaas Modderfontein gehad het om te verhoed dat die brand na sy plaas versprei nie.
Volg Nuus24 op Twitter.
- Volksblad