Boer met Kongokoors in die hospitaal
2010-07-22 10:32
Karen Ebersohn
Bloemfontein - Die gevreesde en “waarskynlik mees oordragbare hedendaagse siekte”, Kongokoors, is Woensdag oorweldigend positief by ’n Namibiese boer in die Bloemfontein-Medi-Clinic gediagnoseer.
Andries Hoffman (44) van die distrik Aroab is Maandagaand in dié hospitaal opgeneem.
Hoffman is aanvanklik Sondag in die Medi-Clinic op Upington opgeneem en is Maandag per lugambulans na die Bloemfonteinse hospitaal oorgeplaas.
Amanda Appelgryn, woordvoerder van die hospitaal, sê hy is in die intensiewesorg-eenheid en word in afsondering gehou. Die toetsuitslae het getoon hy het beslis Kongokoors.
“Dit is nog nie bekend hoe hy die siekte opgedoen het nie. Mense kry dit óf van ’n bosluis óf deur ’n besmette karkas.”
Appelgryn sê die siekte word simptomies behandel. Dit beteken byvoorbeeld indien hy koors het, word die koors behandel. Sy sê Hoffman se toestand is stabiel, maar hy is baie siek.
Suster Rikie Willemse van die hospitaal se infeksiebeheersentrum sê Kongokoors is waarskynlik die mees oordraagbare siekte waarmee gesondheidspersoneel gekonfronteer word.
“Dit is ’n wetlike aanmeldbare, hemorragiese koorssiekte, wat veral deur twee spesies van die bontpootbosluis oorgedra word.”
Sy sê die volwasse bosluis versprei die siekte na diere soos hase, skape en bokke.
“Volwasse bosluise is jagters. Hulle reageer op vibrasies in die grond en sal vinnig uit hul skuilings skarrel en agter prooi aanbeweeg.”
Die bosluise reageer ook op temperatuurwisselings, humiditeit en koolstofdioksiedvlakke in die omgewing.
Willemse sê bosluise is dwarsdeur die jaar te kry, maar die oordra van Kongokoors is hoofsaaklik van Augustus tot laatsomer.
Nie alle bontpootbosluise dra die virus nie.
“Die mens word siek weens ’n bosluisbyt of wanneer ’n besmette bosluis tussen die vingers doodgedruk word, of deur kontak met ’n siek mens se bloed of deur kontak met besmette karkasse.”
Oor hoe die siekte se siklus verloop, sê Willemse:
“Binne drie tot nege dae nadat die pasiënt gebyt is, is daar ’n skielike ontwikkeling van tipiese griepsimptome.
Pasiënte word in afsondering versorg vandat die moontlikheid van infeksie met Kongokoors genoem word.
“Om die diagnose te bevestig word bloed na die Instituut van Virologie in Johannesburg gestuur om die teenwoordigheid van anti-liggame te bevestig en die virus te isoleer.”
Hoffman se familie is nog te getraumatiseer om met die media te praat.
- Volksblad
