Boer in plaashuis vermoor
2009-10-05 11:44
Johannesburg - 'n Boer is koelbloedig doodgeskiet nadat drie mans vroegoggend sy vrou buite hul plaashuis oorval het.
Konst. Sally Skosana, 'n polisiewoordvoeder, het gesê drie mans het Maandagoggend die gesin se plaas in Cullinan betree.
"Die plaaseienaar se vrou het die honde hoor blaf en ondersoek gaan instel. Die drie mans het toe 'n vuurwapen op haar gerig en by die huis ingegaan."
Toe die plaaseienaar wakkerskrik, het een van die mans hom in die bors geskiet. Hy is onmiddelik dood.
Die rowers het twee selfone en 'n skootrekenaar gebuit.
Die trio het glo vroeër by 'n ander plaashuis ingebreek en 'n geweer gesteel.
"Die eienaars van dié huis was nie ten tyde van die voorval by die huis nie," het Skosana gesê.
Niemand is nog in hegtenis geneem nie. 'n Saak van moord en huisroof word ondersoek.
Sapa