Boer in hof ná hy 'betreder' skiet
2009-09-29 11:24
Nicolize van der Walt
Johannesburg - Die boer wat ’n betreder glo op sy plaas buite Lichtenburg geskiet het, is steeds in die hospitaal onder polisiebewaking.
Jan Wessel van der Berg (49) het wel gister vlugtig in die plaaslike landdroshof verskyn op aanklag van poging tot moord. Hy sal na verwagting vandag formeel om borgtog aansoek doen.
Hy word intussen in die Genl. De la Rey-hospitaal in die dorp behandel. Dit is nie bekend of die behandeling met die vermeende skietvoorval verband hou of nie.
Van der Berg word daarvan verdink dat hy mnr. Oupa Mokgalagadi verlede Donderdag omstreeks 18:45 op sy plaas, Mooimeisiesfontein, geskiet het.
“Die slagoffer was van Rooigrond op pad huis toe en het kortpad deur die plaas gevat toe die boer hom glo skiet en wond,’’ het sr.supt. Junior Metsi, polisiewoordvoerder, gesê. Die polisie het glo ook op ’n vuurwapen beslag gelê.
Die provinsiale regering het gister in ’n verklaring oor die beweerde voorval gesê: “Sommige van die aangrensende boere wat die area gepatrolleer het, het gesien hoe Mokgalagadi en ’n vriend deur die veld stap en het die boer daarvan ingelig.
“Hy het met ’n vuurwapen soontoe beweeg. Die vriend het weggehardloop, terwyl die slagoffer in die bosse probeer skuil het. Hy is in die regterbeen geskiet,’’ het Lesiba Kgwela, woordvoerder van die Noordwes-departement van openbare veiligheid, gesê.
Howard Yawa, LUR vir openbare veiligheid, en komm. Lesetja Beetha, provinsiale polisiehoof, het die slagoffer in Lichtenburg besoek. Yawa het gesê Noordwes is nie die “Wilde Weste waar jy sommer jou geweer gebruik nie”.
“Plaaseienaars het nie die reg om ongewapende burgers, wat vir watter rede ook al op hul plase is, te skiet nie.”
Chris Hattingh, provinsiale DA-leier, het in reaksie op hul besoek aan Mokgalagadi gesê: “Dis skokkend en opvallend watter reaksie ’n wit-op-swart-voorval ontketen teenoor ’n oorverdowende stilswye ná die talle swart-op-wit-voorvalle hier.
Plaasaanvalle in Noordwes geniet baie lae prioriteit. Daar moet gewaak word teen rassistiese aanhitsing.”
- Beeld