Boer en seun skok glo plaaswerkers met kabels

2012-09-06 09:49

Johannesburg – ‘n Boer en sy seun wat daarvan aangekla word dat hulle ‘n plaaswerker doodgeskok het, het Woensdag in die Vryburg-landdroshof verskyn, het die polisie in die Noordwes gesê.

Brig. Thulani Ngubane sê die verdagtes word ook daarvan beskuldig dat hulle ‘n ander plaaswerker byna doodgemaak het.

Hy sê die pa en seun word vandag weer in die hof verwag.

Beeld het die beskuldigdes as Mathys (69) en Danie Cloete (34) geïdentifiseer.

Hulle staan tereg op moord, poging tot moord, aanranding en die rig van 'n vuurwapen.

Die twee mans het na bewering twee plaaswerkers na ‘n stoorkamer geroep en hulle daarvan beskuldig dat hulle twee buitebande en 25 liter diesel gesteel het.

Die werkers is na bewering met kettings vasgebind, aangerand en met oorleikabels (jumper cables) geskok toe hulle die diefstal ontken het.

Een van die werkers het op die toneel gesterf en die ander een is beseer.

Volg Nuus24 op Twitter    

- SAPA