Boer bied groot beloning aan ná slagting
2012-01-18 08:00
Oudtshoorn – Die eienaar van die renoster wat Sondagnag onder stropers deurgeloop het, het gister ’n reuse-beloning aangebied vir inligting wat sal meebring dat die skuldiges vasgetrek word.
Die karkas van die vyf jaar oue renosterbul is Maandagmiddag laat in ’n rivierloop sowat 15 m van die wildheining op Kobus Crous se wildplaas, Bergsig, gevind. Die plaas is sowat 6 km buite Hartenbos.
“Ek bied ’n beloning aan van R100 000 vir enigiemand met inligting oor die stropers,” het Crous gesê. “Iemand moet tog iets weet en ek wil dit die moeite werd maak vir mense om die inligting te verskaf.”
Volgens Crous is die renosterbul en -koei, wat saam in ’n kamp geloop het, op die plaas gebore. “Hulle was die eerste renosters wat hier gebore is en was baie na aan my hart. Hulle was mak en het altyd nuuskierig nader gekom as ’n mens naby hulle stilhou.”
Dit is waarskynlik juis dié goedaardigheid wat van die reuse-dier ’n maklike prooi gemaak het. “Hy is waarskynlik op ’n kort afstand met ’n pyl verdoof.
“Die forensiese ondersoekspanne van Kaapstad was heeldag hier besig, maar kon nie met ’n metaalverklikker vasstel of daar ’n koeël in die renoster se kop of lyf is nie.”
Spesialis-polisie-eenhede het die toneel gefynkam, maar kon ook geen bewyse van die pyl vind nie.
“Die bewyse is waarskynlik verwyder,” het Crous gesê.
Die middel wat gebruik word om diere te verdoof is nie in die handel beskikbaar nie. “Dit kan net deur ’n veearts verskaf word, maar omdat renosterhorings in die sluikhandel verkoop word, is dit seker moontlik dat die stropers ook die verdowingsmiddels só in die hande kan kry.”
Dr. Willem Burger, ’n veearts van Oudtshoorn wat Maandagaand en gister met die ondersoek gehelp het, het gesê ’n renoster wat nie vrek weens ’n oordosis verdowingsmiddel nie, lewe nog wanneer die horing verwyder word.
“Die dier kom by, maar vrek uiteindelik weens massiewe bloeding,” het Burger verduidelik.
Enigiemand met inligting wat kan lei tot die suksesvolle vervolging van die stroper(s) kan die ondersoekbeampte, ao. Boet Olckers, by (071) 351 7450 bel.
– Volg Nuus24 op Twitter.
- Die Burger