Boelies is skole se grootste probleem – opname
2012-12-04 12:44
Johannesburg – Boelies is die grootste probleem in skole, het die navorsingsgroep Pondering Panda in 'n opname bevind.
Altesaam 7 324 Suid-Afrikaanse leerders, onderwysers en families van leerders tussen die ouderdomme van 13 en 34 is gevra om die grootste probleme by hul skool te identifiseer.
"Boelies bly een van die grootste redes vir kommer, met 28% wat sê dit is een van die grootste probleme by hul skool," het die groep in 'n verklaring gesê.
Die opname word gereeld per selfoon gedoen.
In Junie het 31% van respondente gesê boelies is die grootste probleem.
'n Kwart van respondente het ouers se onbetrokkenheid gekritiseer terwyl 24% gekla het oor toiletgeriewe.
Boelies is 'n groter rede vir kommer onder jong respondente.
'n Derde van 13- en 14-jarige leerders het boelies geïdentifiseer as 'n groot probleem, vergeleke met 25% van leerders in die ouderdomsgroep 15 tot 17.
Minder swart mense sien boelies as 'n groot probleem, met slegs 26% wat dit as 'n probleem geïdentifiseer het.
In teenstelling hiermee, het 40% van wit mense 35% van bruin mense en 52% van Indiërs gesê boelies is 'n groot probleem.
In die Wes-Kaap (35%), Gauteng (35%) en die Noordwes (33%) word boelies as 'n groot probleem gesien.
"Dit is duidelik dat boelies 'n regte probleem is in skole," het Shirley Wakefield, woordvoerder van Pondering Panda, gesê.
"Die feit dat dit meer belangrik geag word as infrastruktuurvereistes, beteken dat dit hoog op die prioriteitslys van onderwysers, ouers, en onderwysbeamptes moet wees."
Wakefield het gesê om geboelie te word, het skadelike langtermyn-uitwerkings op leerders se psige en hul vermoë om te leer.
Sy het gesê die probleem kan vererger deur die toename in kuberboelies, wat nie so maklik is om te identifiseer nie.
– Volg Nuus24 op Twitter
- SAPA
