Boeke en skryfbehoeftes by skool verbrand
2012-01-18 16:57
Johannesburg – Boeke en skryfbehoeftes is Woensdag in ‘n voorval van brandstigting by ‘n hoërskool in Matlala vernietig, het die polisie in Limpopo gesê.
“Ons weet regtig nog nie of dit skoliere, onderwysers of iemand anders was wat die voorraad aan die brand gesteek het nie. Ons ondersoek die voorval,” het lt. kol. Mohale Ramatseba gesê.
Die voorraad is vroeg in die oggend in die personeelkamer van die BK Matlala Hoërskool verbrand, met skade van sowat R60 000 wat aangerig is.
Teen 12:00 was niemand nog in verband met die voorval in hegtenis geneem nie.
‘n Soortgelyke voorval het verlede jaar ook met die openingsdag by die skool plaasgevind en niemand is in hegtenis geneem nie. Skade wat R360 000 beloop het is deur ‘n brand in die biblioteek aangerig.
Ramatseba het enigiemand wat oor inligting oor die voorvalle beskik aangemoedig om die polisie te kontak.
Die departement van onderwys in Limpopo was nie onmiddellik beskikbaar vir kommentaar nie.
– Volg Nuus24 op Twitter
- SAPA