Boeie af, toe val inbreker weer aan
2010-07-28 09:37
Pretoria - ’n Gesin wat deur ’n indringer in hul huis aangeval is, eis skadevergoeding omdat die polisie die aanvaller se boeie op die toneel afgehaal en hy sy aanval toe glo voortgesit het.
Willem van Schalkwyk (47), sy vrou, Ria (45), en hul kinders, Liela (20) en Hestie (19), eis in die hooggeregshof in Pretoria verskillende bedrae van die minister van veiligheid en sekuriteit (polisie).
Dit wissel van R1,5 miljoen vir Van Schalkwyk tot R310 000 vir elke dogter.
Luidens hul hofstukke het ene Mathome Simon Maphetho op 6 Oktober 2007 by hul huis in Polokwane ingebreek.
Hy het Van Schalkwyk ’n aantal kere met ’n mes gesteek.
Ria Van Schalkwyk en Liela het die mes afgevat en Maphetho in bedwang probeer bring.
Konst. Manyane Jonas Tshepo, ’n polisiereservis, het opgedaag, gevolg deur insp. Malesela Lucas Mogolane en insp. Mackson Mogau Selepe.
Tshepo het Maphetho geboei en toe in ’n taal wat die Van Schalkwyks nie verstaan nie, met hom gepraat.
Daarna het Tshepo aan die gesin gesê hy kan Maphetho nie arresteer nie, “want daar was te veel bloed, of woorde tot dié effek”.
Hy het die boeie losgemaak en die kamer verlaat. Maphetho en die gesin het daar agtergebly.
Die eisers beweer Maphetho het die mes gevat en Van Schalkwyk weer gesteek.
Maphetho is weer in bedwang gebring.
Ria Van Schalkwyk wou haar ernstig gewonde man in hul Toyota Fortuner hospitaal toe neem.
Die polisievoertuig het die erf se ingang versper.
Die polisie het geweier dat die egpaar die erf verlaat, word beweer.
Ria Van Schalkwyk het toe teen die polisievoertuig gebots en dit uit die pad gestoot.
’n Klag van roekelose of nalatige bestuur is teen haar ingedien. Dit is later teruggetrek.
Die verweerder sê in hofstukke nadat Tshepo die boeie aangesit het, het hy die gesin beveel om uit die huis te gaan omdat dit ’n misdaadtoneel is.
Maphetho het toe tekens getoon dat hy “onwel” was.
Hy het erg gebloei en flou geword.
Tshepo het die boeie afgehaal weens Maphetho se toestand.
Hy was tevrede dat Maphetho nie in staat was om weg te hardloop nie.
Die verweerder sê Tshepo was te alle tye in die gesin se teenwoordigheid en in dié tyd het Maphetho geeneen aangerand en/of gedreig nie.
Die hof het die verweerder dié week gelas om op ’n kennisgewing van die eisers te reageer.
- Beeld