'Boef soos Mugabe nie in SA welkom'
2012-01-06 07:32
Bloemfontein – Pres. Robert Mugabe is ’n “boef” en “misdadiger”.
Hy behoort nie in ’n demokratiese land soos Suid-Afrika welkom te wees nie, sê leiers van Vrystaat Landbou (VL), die DA en die Zimbabwiese Beweging vir Demokratiese Verandering (MDC).
Dit kom nadat die regerende party in Suid-Afrika bevestig het die omstrede Zimbabwiese president is onder die gaste wat die naweek vir die ANC se eeufeesvieringe in Bloemfontein verwag word.
Louw Steytler, president van VL, sê Mugabe se regeringsbeleid het vernietigende maatskaplik ekonomiese gevolge in Zimbabwe gehad. Dié president is volgens hom ook skuldig aan “massiewe vlakke van menseregteskendings”.
“Sulke boewe behoort nie ’n platform in Suid-Afrika (’ndemokratiese land) te kry nie. As die Dalai Lama nie hier welkom is nie, hoe op aarde kan ons Mugabe, wie se optrede strydig met Suid-Afrika se Grondwet is, na ons land nooi?”
Roy Jankielsohn, Vrystaatse DA-leier, sê Mugabe het sy land, wat ’n broodmandjie in Suider-Afrika was, verander na ’n gefaalde staat wat afhanklik van voedselhulp is.
“In Zimbabwe bestaan grootskaalse hongersnood en ellende.”
Jankielsohn sê dit is ’n groot bron van kommer dat die regerende party in Suid-Afrika Zanu-PF en Mugabe as van hul groot vriende beskou. “Dit spreek boekdele van hul toekomsvisie vir Suid-Afrika.”
Volgens hom is Mugabe een van die grootste internasionale “misdadigers en skurke”. “Hy behoort agter tralies te sit en nie op Suid-Afrikaanse belastingbetalers se rekening in luukse verblyf saam met ANC-vriende duur whisky te drink nie.”
Charles Matorera, leier van die MDC in die Vrystaat, sê demokrasie word saam met die ANC se 100-jarige bestaan gevier. “Dit is waarvoor die ANC staan.”
Volgens hom is Mugabe glad nie ’n voorbeeld van ’n demokratiese leier nie.
Lindiwe Zulu, ’n lid van die ANC se nasionale uitvoerende komitee, sê Mugabe is na die eeufeesvieringe genooi, want sy land is een van dié wat tot die vryheidstryd in Suid-Afrika bygedra het. Volgens Zulu het Zimbabwe ook gehelp om die ANC uit te bou.
Sy het Donderdag gesê die regerende party gaan nie oor die meriete van Mugabe se teenwoordigheid op die eeufeesvieringe debatteer nie.
Volg Nuus24 op Twitter
- Volksblad